ЈОГА: За уморните, напнатите и оние под стрес

7 ефикасни вежби

Вежбајќи јога, придвижете го најдоброто во себе, разбудете го чувството на пријатност и обновете ја виталноста…

1 СТРАНИЧЕН ТРИАГОЛНИК (Текстот продолжува по огласот)

Вдишете, а при издишување малку свиткајте го десното колено и десната дланка поставете ја на надворешната страна на десното стапало, со раката на потколеницата. Левата рака испружете ја косо и во линија со телото, а целото тело нека остане во една линија. Погледот насочете го во правец на левата дланка. Концентрирајте се на истегнување на целата лева страна на телото, обидете се да се опуштите и да се задржите во таа положба од 30 сек. До 1 мин., а потоа повторете ја постапката истегнувајќи ја спротивната страна на телото.

ДЕЈСТВО: ги зајакнува и ги истега долните екстремитети, го шири градниот кош, ги смирува симптомите на артритис, ја поттикнува внатрешната масажа на стомакот и олеснува елиминирање на отпадните материи.

Лицата што имаат болки во грбот, пред почеток на вежбањето, задолжително треба да се консултираат со својот лекар

2 ШТИПКА

Важно е цело време додека вежбате да се обидувате да го освестите својот максимум и да го придвижите за милиметар, следејќи ја реакцијата на телото

Лежејќи на грб, вдишете и кренете ги рацете над главата, а издишувајќи кренете ги од подот. Со главата следете ги движењата на рацете, и кога дланките ќе ги допрат бутовите, почнете да ги кревате рамениците. Лизгајте со дланките кон скочниот зглоб и опфатете ги потколениците или стапалата, стомакот повлечете го кон бутовите, а со градите тежнејте поблиску до колената.

Во оваа положба дишете полека и длабоко. Издишувајќи лизгајте со дланките покрај бутовите, спуштајте се прешлен по прешлен, со грбот на земја, рацете кренете ги над главата, вдишете, истегнете се и издишувајќи опуштете се со рацете покрај телото.

ДЕЈСТВО: оваа вежба има поволно дејство врз варењето на храната, го смирува нервниот систем, поттикнува истекување на менструалната крв, дејствува врз карличните органи, како и врз половите жлезди. Ги истегнува ’рбетниот столб и мускулите на нозете.

 КОНТРАИНДИКАЦИИ: трудници.

3 МАЧКА

Од почетната положба, вдишувајќи свиткајте го грбот надолу, а вратот и главата нека се стремат наназад, а рацете нека се истегнати. Издишувајќи истегнувајте се спротивно, „заоблете“ го грбот, вратот свиткајте го нанапред, вовлечете го стомакот, а погледот насочете го кон стомакот.

ДЕЈСТВО: ги истегнува грбните и градните мускули и поволно влијае врз карличните органи. Вежбата им годи на трудниците.

4 ЛАК НА ГРБОТ

Од почетната положба како на сликата, вдишувајќи, кренете ги колковите тежнеејќи со градите да ја допрете брадата. Издишувајќи вратете се со седечкиот дел на земја. Вежбата можете да ја повторите 5-7 пати. Доколку не можете да ги допрете стапалата, рацете задржете ги покрај телото, со дланките свртени кон подлогата.

ДЕЈСТВО: ги истегнува и ги зајакнува грбните мускули, стомачните и градните мускули, го шири градниот кош и поволно влијае врз карлицата и врз карличните органи.

 5 СКАКУЛЕЦ

 Дишете низ напнатите делови на телото, постепено опуштајќи ги

Легнете на стомак, вдишувајќи кревајте ги нозете, рацете и главата, истегнете ги рацете кои треба да бидат паралелни со подлогата, градниот кош турнете го нанапред, нозете задржете ги исправени и споени. Останете во оваа положба половина минута и издишувајќи вратете се во почетна положба. Ова повторете го уште еднаш или двапати.

ДЕЈСТВО: ја подобрува еластичноста на ’рбетниот столб, ги отстранува тегобите и болките во половината, спречува појава на дискус хернија. Ги масира стомачните органи, отстранува чувство на подуеност и има поволно дејство врз желудникот.

 КОНТРАИНДИКАЦИИ: акутни стомачни проблеми, лица со проблеми во желудникот и со болки во ’рбетот, како и трудници.

6 МОЛЊА

Од почетна положба, која сама по себе ги истегнува зглобовите и лигаментите на нозете, рацете ставете ги на колковите и вдишувајќи тежнејте со градниот кош нанапред, а со лактите и со рамениците наназад. Издишувајќи можете да го свиткате вратот наназад, потоа вдишете во таа положба и со следното издишување тежнејте со лактите, рамениците и со главата напред, а градниот кош повлекувајте го назад. Така го истегнувате грбот. Вдишувајќи вратете се во почетна положба и повторете ја вежбата 5-7 пати.

ДЕЈСТВО: истегнувањето на градните и на грбните мускули ги освежува горниот дел на грбот и мускулите помеѓу лопатките.

7 ЗАЈАК

Сите вежби треба да се прават во граници на пријатност…

Од клекната положба трупот виткајте го нанапред така што да остварите контакт помеѓу градите и бутовите, челото и подлогата. Рацете испружете ги покрај себе, дишете бавно и длабоко.

ДЕЈСТВО: оваа положба ги смирува целиот нервен систем и работата на срцето. Доволно е длабоко да дишете една минута за да ја почувствувате благотворноста на оваа положба. Го истегнува долниот дел на ’рбетот, го масира стомакот и го освежува лицето со нов прилив на свежа крв. Лицата на кои им пречи стомакот, при правење на оваа вежба можат да се потпрат со подлактиците на земјата.

Текст: Наташа Човиновска

Фото: Getty Images

loading...
Прочитајте и

Оставете одговор

Вашата мејл-адреса нема да биде прикажана.

Ви благодариме за коментарот!

This site uses Akismet to reduce spam. Learn how your comment data is processed.

Сакаш посебен третман?
Зачлени се во елитниот клуб. Регистрирај ја својата е-адреса и добивај специјални понуди и вести
Одјава е можна во секое време