Фитнес-совети од Емилија Колоска: Кои се најдобрите вежби за обликување на струкот?

Бидете вити и здрави

Совет побаравме од Емилија Колоска, инструкторка во фитнес-студиото „Кинетикс“

Многу девојки копнеат по тенок струк, но малкумина знаат дека намалувањето на овој дел од телото во најголема мера зависи од исхраната. „Не постои начин да целиме само на една точка од нашето тело. За да го истенчиме делот околу јадрото, најпрво е важно да ги отстраниме масните наслаги, а тоа е можно само доколку практикуваме калориски дефицит, односно внесуваме помалку храна одошто трошиме“, објаснува Емилија Колоска (@emilijakoloska). Секако, не треба да се занемарат ниту вежбите за целосна активација на јадрото. Фитнес-програми со различен фокус можете да ги најдете на нивниот веб-сајт на „Кинетикс“ –  www.kineticsfitness.mk, а во продолжение ви откриваме дел од тајните за цврсто јадро и убаво обликуван струк.

Како да го зацврстите јадрото?

Емилија порачува да вклучите вежби за јадро  и за странични стомачни мускули на крајот од секој тренинг, за да се приближите до посакуваниот изглед на струкот: „Поразвиен грб и поразвиен долен дел на телото може да придонесат за визуелно потенок струк. Првите резултати зависат од многу фактори, како што се интензитетот и фреквентноста на тренинзите и исхраната, но, генерално, потребни се 12-16 недели за да се забележат првите промени“. Најчестата грешка, пак, што девојките ја прават е занемарувањето на правилниот начин на исхрана. „Не можеме да очекуваме надворешни резултати без да го промениме она што го внесуваме во своето тело“, заклучува Емилија.

3 вежби за странични стомачни мускули по избор на Емилија

1 СТРАНИЧНИ СТОМАЧНИ ВЕЖБИ СО ПОДИГНУВАЊЕ НА НОЗЕТЕ

Легнете странично на земја. Раката што е на подот поставете ја под агол од 45 степени во однос на телото. Од оваа позиција, започнете да го кревате торзото кон нозете, кои треба да останат исправени. При кревањето, одлепете го рамото од земја, а долната рака нека ви остане потпрена на лактот. Откако ќе почувствувате активација на страничните стомачни мускули, повторно спуштете се долу.

2 СТРАНИЧНИ СТОМАЧНИ ВЕЖБИ

Поставете го телото странично на земја, со малку свиткани колена. Овој пат долното рамо останува залепено на земја во текот на целото движење. Придвижете го лактот најпрво нагоре, а потоа кон долниот дел на телото. Задржете се неколку секунди во таа позиција, па полека спуштете го горниот дел од телото.

3 СТРАНИЧЕН ПЛАНК

Поставете го левиот лакт на земја, точно под левото рамо. Стапалата издолжете ги по линијата на телото, едно врз друго, и со ангажирање на левата страна на јадрото, кренете го телото. Левото рамо држете го стабилно. Потоа почнете да ги спуштате колковите надолу кон земја и да го кревате телото во првичната позиција.

Подготвила: Марија Лукаревска

ФОТО: demaerre/iStock via GETTY IMAGES, ПРИВАТНА АРХИВА

Фитнес-експертка одговара на прашањето: Зошто најтешко се симнува вишокот од стомакот?
Прочитајте и
Оставете одговор

Вашата мејл-адреса нема да биде прикажана.

Ви благодариме за коментарот!

This site uses Akismet to reduce spam. Learn how your comment data is processed.

Сакаш посебен третман?
Зачлени се во елитниот клуб. Регистрирај ја својата е-адреса и добивај специјални понуди и вести
Одјава е можна во секое време