Дали секој може да вежба кросфит? Побаравме стручно мислење од наша фитнес-инструкторка!

Бидете вити и здрави

На нашите прашања одговори Елисавета Димовска, персонална и кросфит-тренерка

Да! Кросфитот е спорт наменет за секого. Може да ве научи како правилно да го движите своето тело и како правилно да подигнувате тежини/товар, што е особено важно во понапредни години, кога доаѓа до појава на остеопороза и други последици на неактивност и неизградена мускулатура. И не грижете се доколку сметате дека немате доволно кондиција за да го издржите напорниот тренинг. За секоја вежба во кросфитот постоjат варијација и можност да се приспособи во зависност од способностите на индивидуата. Што сè треба да знаете за овој функционален тренинг, ни откри тренерката Елисавета Димовска.

Што можете да очекувате од еден кросфит-тренинг?

Тренингот започнува со загревање и мобилизирање на телото во зависност од планираните вежби, потоа се работи на изучување и подобрување на техниката и силата за одредени движења и на крајот се работи на кондицијата и издржливоста. „За една програма да се нарече кросфит, таа треба да вклучува елементи од гимнастика, олимписко кревање тежини, пауерлифтинг, како и вежби со сопствена тежина“, открива Елисавета.

Ако ве интересира колку калории може да потрошите на еден кросфит-тренинг, Елисавета порачува дека главниот фокус не треба да бидат калориите, туку подобрувањето на генералните фитнес-способности: „Кросфитот ќе ви помогне да бидете во најдобра форма, а и ќе станете дел од една заедница што работи на истите цели, ќе изградите нови познанства и ќе го подобрите вашето физичко и ментално здравје“.

ВЕЖБАМЕ И ДОМА:

Вежби со сопствена тежина што можете да ги правите дома

1 КЛЕКНУВАЊА

Застанете исправено. Стапалата треба да се во ширина на рамената. Клекнете така што ќе ги притиснете колковите наназад и ќе ги свиткате колената. Внимавајте колената да не ја преминат замислената линија на стапалата. Задржете се малку така, па вратете се во почетната позиција.

2 ИСЧЕКОР

Застанете исправено и исчекорете напред. Чекорот треба да е долг онолку колку што е потребно за петицата на задната нога да се поткрене од земјата. Спуштете се надолу, но внимавајте коленото на предната нога да не го спуштите под агол од 90 степени.

3 СКЛЕК

Активирајте ги градните мускули, рамената и трицепсот. Испружете ги нозете на подот, а рацете поставете ги малку пошироко од рамената. Спуштете го телото до подот, свиткувајќи ги лактите, па повторно кренете го нагоре. Ако ова ви е премногу тешко, спуштете ги колената на подот.

Разговарала: Марија Лукаревска

ФОТО: GETTY IMAGES, ПРИВАТНА АРХИВА

Бидете вити и здрави: Ви откриваме кои се најефикасните фитнес-реквизити!
Прочитајте и
Оставете одговор

Вашата мејл-адреса нема да биде прикажана.

Ви благодариме за коментарот!

This site uses Akismet to reduce spam. Learn how your comment data is processed.