Разговаравме со Стефанија Бубало, фитнес-инструкторка во Ultimatefit Alebras (@ultimatefitalebras)
„Виснатите“ надлактици се најголемиот кошмар за повеќето девојки што копнеат по совршено обликувани раце. Постојат повеќе опции за тренинг на овој дел од телото (вежбање со справи, со реквизити или со сопствена тежина), но за да постигнете резултати, најважно е тоа колку сте посветени. „Работиме програми за цело тело, каде што речиси секој час вклучуваме вежби за таа регија. Но резултатите зависат од тоа колку пати вежбате во неделата, како се храните, колкав е обемот на рацете и каква програма практикувате“, објаснува Стефанија Бубало (@stefibubalo). Од нејзиното искуство, првите резултати од вежбањето, придружено со правилна исхрана, се забележуваат уште првиот месец!
Кој реквизит е најдобар за тонирање на рацете?
Голем број жени се плашат да вежбаат со тегови, бидејќи мислат дека така мускулите на рацете премногу ќе им се развијат и ќе ја изгубат женственоста. Но токму теговите се одличен реквизит што придонесува за обликување на рацете! „Со правилно дозирање на тренингот и на тежината, може да се постигнат посакуваните резултати. Секое прекумерно вежбање со тежина од незнаење и неискусност може да придонесе за преголемо развивање на рацете, па затоа треба да се применува соодветна програма или да се работи со тренер, кој ќе ве води низ целиот процес“, порачува Стефанија.
Три топ-вежби за раце по избор на Стефанија
1 ВЕЖБА ЗА ТРИЦЕПС СО СТОЛЧЕ. Столчето може да послужи како одличен реквизит ако вежбате во домашни услови. Седнете на столче, поставете ги стапалата на подот и оддалечете ги малку од столчето. Рацете треба да ви бидат исправени, така што дланките ќе ви бидат покрај колковите, а со прстите ќе се држите за седиштето. Спуштете го задникот речиси до подот, така што ќе ги свиткате лактите за да формираат агол од 90 степени и вдишете. Издишувајте додека се враќате во почетната позиција.
Поврзани објави
2 СКЛЕК. Време е да се обидете да направите класичен склек! Легнете на подот и задржете се на рацете и на прстите на стапалата. Обидете се да го спуштите телото што е можно поблиску до подот, така што ќе ги свиткате лактите и ќе го држите грбот исправен. Потоа, вратете се во почетната позиција и направете што е можно повеќе повторувања.
3 ВИСОК „ПЛАНК“. Почнете долу на под, поставете ги рацете директно под рамената, а нозете испружете ги назад. Обидете се да задржите права линија од главата до петиците и стегнете ги мускулите на стомакот и рацете. Не дозволувајте колковите да ви се спуштаат надолу! Задржете се во таа позиција од 15 до 30 секунди. Кога ќе зајакнете доволно, зголемете го времетраењето на една минута.
Подготвила: Марија Лукаревска
ФОТО: ПРИВАТНА АРХИВА, STEFANAMER/SOLAR 22/GETTY IMAGES VIA GULIVER