Трендови кај венчаниците за 2020 година
Доколку се прашувате што ќе биде тренди во светот на венчаниците во 2020 година, ние го имаме одговорот на сите ваши прашања.
Елегантни и гламурозни фустани како од бајките – така би ги опишале креациите на „Емили ексклузив дизајн“, дизајнерско студио чие модно мото е – квалитетни материјали, рачна изработка и уникатност на моделите. Сите најнови трендови во дизајнот на венчалните фустани ги пронајдовме во ова модно ателје.
Изненадувачки е лесно да бидете како кралска невеста
Идните невести со минималистички вкус веројатно беа воодушевени од „Живанши“ венчаницата на Меган Маркл, па тоа е модел кој ќе биде актуелен и во наредните неколку години. Тоа го земаа предвид и повеќе дизајнери на венчаници кои во своите колекции вметнаа слични модели, со едноставни линии, мазни материјали, без чипки и украси.
Фенси пердуви
Ова не е прва сезона во која ги гледаме пердувчињата кај венчаниците, бидејќи и до сега беа популарен избор меѓу невестите. Навистина, има нешто
безвременско кај пердувите, а дизајнерите вешто ги вметнуваат во нивните креации.
Поинаков волумен
Ако класична балска венчаница е премногу демоде за вас ( а и за нас!), а сепак сакате венчаница со волумен, дизајнерите предлагаат да одберете модел со волумен во само еден дел. Каролина Херера во својата колекција тоа го постигнува со преклопени слоеви од сатен, додека Вера Ванг го постигна овој ефект со асиметрична, рачно пришиена „грмушка“ во предниот дел од нејзината кремаста венчаница од тул.
Мини фустан за афтер-парти
За невестите кои сакаат слободно да танцуваат на подиумот после венчавката, мини фустанчињата се најпопуларната опција. Моделот на Оскар де Ла Рента има долг пуштен дел од реси, кој слободно паѓа од едната страна, и шармантно ќе се лелее додека танцувате.
Венче наместо вел
Без разлика дали ќе се одлучите за поголемо и гламурозно невестинско венче, или ќе изберете поедноставен модел, дефинитивно ќе бидете тренди со ваков украс на главата.
Напред кратко, позади долго
Отсекогаш сте сонувале дека на свадбата ќе носите класична венчаница, но сакате да има и модерни елементи? Дефинитивно треба да го испочитувате овој тренд, одбирајќи модел кој е краток во предниот, а долг во задниот дел.
За невестите што мразат , фустани, корсети и тул
Ако сте од оние невести кои не сакаат да носат венчаница и мразат корсети и тулови, дизајнерите нудат и други опции, како комбелизони или невестински панталони.
Долги,проѕирни ракави
Многу дизајнери во своите креации на венчаници за 2020 година имаат проѕирни ракави, што е уште еден детаљ кој ќе направи да изгледате секси и тренди.
