Објавена „И на небо и на земја“, новата книга на отец Милан Ѓорѓевиќ

Издавачката куќа „Паблишер“ ја објави книгата И на небо и на земја од македонскиот теолог и философ отец д-р Милан Ѓорѓевиќ. Ова е третата книга на Ѓорѓевиќ и претставува кодекс на научни и есеистички сочиненија групирани во три поглавја. Отец Милан Ѓорѓевиќ е вонреден професор на Православниот богословски факултет „Свети Климент Охридски“ во Скопје.

Централната тема која ги проникнува сите три тематско-методолошки целини на книгата е тензијата меѓу историското и метаисториското, од една страна, и тензијата меѓу различните димензии за историчноста, од друга страна. Насловот И на небо и на земја кореспондира со светоотечка максима „во овој свет, но не од овој свет“, која се однесува на присуството на Црквата во светот и историјата.

Во текстовите поместени во книгата опфатени се тематски области како современото истражување на византиската философија, патристиката, систематското и евхаристиското богословие, потем историјата на просветителството во Македонија, меѓукултурниот и меѓурелигискиот дијалог, политичката философија, културната историја, критиката на идеологијата, етиката, психологиајта, просветата, литературата, филмот, празниците и обичаите, човековите права, воспитанието и образованието, дигиталната култура итн.

Отец д-р Милан Ѓорѓевиќ е автор на монографијата Nikolas Kabasials – ein Weg zu einer Synthese der Traditionen објавена за престижната издавачка куќа Peeters во серијата „Recherches de Théologie et Philosophie médiévales – Bibliotheca“ на германски јазик, како и на монографијата Византија во дијалог. Автор е на повеќе од 40 научни трудови од областа на философската и теолошката византологија, патрологијата, христијанската етика и аскетското богословие, пастирската психологија и книжевноста.

Текст и фото: ПР

loading...
Прочитајте и

Оставете одговор

Вашата мејл-адреса нема да биде прикажана.

Ви благодариме за коментарот!

This site uses Akismet to reduce spam. Learn how your comment data is processed.

Сакаш посебен третман?
Зачлени се во елитниот клуб. Регистрирај ја својата е-адреса и добивај специјални понуди и вести
Одјава е можна во секое време