Европската Унија продолжува конкретно да ја поддржува економската трансформација на Македонија преку Планот за раст за Западен Балкан.
Како признание за спроведените реформи и усогласувањето со европските стандарди, земјата ја доби својата втора исплата во износ од 15,9 милиони евра.
Од овие средства, 7,4 милиони евра се директна буџетска поддршка за државата, додека преостанатиот износ е наменет за финансирање инфраструктурни проекти преку Инвестициската рамка за Западен Балкан (WBIF). Овие инвестиции ќе поддржат проекти во одржлив транспорт, чиста енергија, дигитален развој и унапредување на човечкиот капитал – области кои се клучни за долгорочен економски раст и конкурентност.
Поврзани објави
Со оваа исплата, вкупната поддршка што Македонија ја доби досега преку Планот за раст достигнува 23,8 милиони евра. Планот има за цел да ги забрза подготовките за членство во ЕУ, носејќи конкретни придобивки уште пред полноправната интеграција – преку пристап до финансиски средства, инвестиции и постепено вклучување во делови од единствениот европски пазар.
Европската поддршка не е само финансиска помош, туку поттик за реформи, институционално зајакнување и стабилен економски развој. За Македонија, Планот за раст значи побрз пат кон ЕУ, посилна економија и подобри услови за живот на граѓаните.
Текст и фото: ПР