Ако постои еден моден тренд што секое лето се враќа уште посилен, тогаш тоа без сомнение е леопардестиот принт. Без разлика дали станува збор за едноделен костим за капење, бикини, парео или модни додатоци, животинските дезени и ова лето се меѓу најпосакуваните избори на плажите ширум светот.
Модните куќи уште во своите пролетно-летни колекции најавија дека животнискиот принт повторно ќе биде во центарот на вниманието, а трендот многу брзо го прифатија и бројни светски, но и балкански познати дами.
Леопардестиот дезен одамна престана да биде симбол само на смелост. Денес тој претставува комбинација од самодоверба, женственост и безвременска елеганција, поради што стилистите го нарекуваат „малото црно фустанче“ меѓу летните принтови.
Балканските убавици веќе го избраа
Меѓу првите што ова лето се појавија во впечатливи леопардести костими за капење беа македонските телевизиски водителки Јована Стојменовиќ и Лила Филиповска.
Двете на социјалните мрежи објавија фотографии од плажа во костими со ист принт, покажувајќи дека класичниот животински дезен и понатаму е синоним за гламурозен летен изглед. Нивните фотографии предизвикаа бројни реакции и коментари, а многумина забележаа дека леопардестиот мотив повторно се враќа во голем стил.
Трендот ѝ е омилен и на уште една македонска водителка – Марјана Станојковска, а го следат и бројни српски јавни личности.
Северина, Наташа Беквалац, Цеца Ражнатовиќ, Емина Јаховиќ, Сека Алексиќ во изминатите сезони повеќепати покажаа дека животинскиот принт е нивен омилен избор за летните комбинации.
View this post on Instagram
Модните инфлуенсерки од Хрватска, Србија и Бугарија, исто така, масовно се фотографираат во вакви модели, што дополнително го потврдува неговото големо враќање.
Поврзани објави
Зошто леопардестиот принт никогаш не излегува од мода?
Модните експерти велат дека тајната лежи во неговата разновидност.
Леопардестиот дезен:
- визуелно изгледа луксузно;
- одлично се комбинира со црни, бели, крем и златни детали;
- им прилега на речиси сите тонови на кожа;
- изгледа впечатливо и на едноделни костими и на класични бикини.
Покрај тоа, овој принт лесно се комбинира со ленени кошули, широки шешири, златен накит и плетени чанти – комбинација што доминира на Инстаграм ова лето.
Кои модели се најактуелни?
Најголем хит за сезоната лето 2026 се:
- асиметрични едноделни костими со леопардест принт;
- бикини со висок струк;
- модели со метални детали и златни алки;
- кафеаво-црни, но и модерни варијанти во беж, маслинесто зелена и бордо нијанса.
Особено популарни се минималистичките кроеви што му дозволуваат на самиот дезен да биде во центарот на вниманието.
Тренд што ги надживува сезоните
Додека некои модни трендови траат само едно лето, леопардестиот принт успешно им одолева на сите промени. Од Брижит Бардо и Урсула Андрес, преку супермоделите од деведесеттите, па сè до денешните инфлуенсерки и телевизиски ѕвезди, овој дезен останува симбол на самоувереност и безвременски стил.
Судејќи според фотографиите што секојдневно ги преплавуваат социјалните мрежи, едно е сигурно – ако сакате костим за капење што ќе биде забележан, леопардестиот принт и ова лето е најсигурниот моден избор.
Фото: Инстаграм, Фејсбук