Во последните години, ретинолот се наметна како една од најмоќните и најпопуларни состојки во антиејџ-негата. Познат како дериват на витаминот А, тој одамна не е резервиран само за лицето – сè почесто се користи и во рутината за нега на целото тело.
Сè повеќе дерматолози истакнуваат дека ретинолот може да донесе видливи промени и „од вратот надолу“, па затоа лосионите со оваа состојка стануваат сè поприсутни на пазарот за телесна нега.
Моќен сојузник за кожата на целото тело
Ретинолот делува преку стимулирање на обновата на клетките и поттикнување на продукцијата на колаген и еластин – клучни протеини за цврста и еластична кожа. Резултатот е порамномерна текстура, поизедначен тон и видливо подмладен изглед.
Според дерматолозите, оваа состојка може да помогне во намалување на хиперпигментации, измазнување на кожата и подобрување на нејзината мекост. Дополнително, со текот на времето ја намалува појавата на фини линии, особено во подрачја како рацете, каде знаците на стареење први стануваат видливи.
Како што истакнува дерматологот Никол Ли, зацврстувањето на кожата истовремено може да ја намали и нејзината подложност на ситни повреди, модринки и пукање, кои стануваат почести со стареењето.
Исто така, поради својот пилинг-ефект, ретинолот може да помогне и кај затнати пори, акни на телото, како и кај состојби како т.н. „strawberry legs“.
Дерматологот Мајкл И. Џејкобс наведува дека редовната употреба може да придонесе за подобрена текстура, осветлување на кожата и подобрување на состојби како кератоза пиларис.
Како да се избере вистински ретинол за тело
Изборот на соодветен производ е клучен, бидејќи кожата на секој човек реагира различно. Дерматолозите препорачуваат почеток со пониски концентрации, особено за оние што првпат го користат ретинолот.
Важно е производот да содржи и хидратантни состојки, бидејќи ретинолот може да предизвика сувост. Кај чувствителна кожа, се препорачуваат специјално формулирани производи, а дополнително внимание треба да се посвети и на пакувањето – темната и непроѕирна амбалажа помага во зачувување на стабилноста на состојката.
Правилна примена и постепено воведување
При воведување на ретинол во рутината за нега на телото, се препорачува употреба еднаш до двапати неделно, со постепено зголемување на фреквенцијата.
Прекумерната употреба може да доведе до иритација, црвенило и сувост на кожата. Затоа, дерматолозите советуваат тестирање на мал дел од кожата пред редовна употреба.
Ретинолот се нанесува исклучиво навечер, во тенок слој, а резултатите најчесто стануваат видливи по неколку недели доследна употреба.
Комбинирање со други производи и заштита
Во рутината може да се комбинира со хидратантни креми и емолиенси за намалување на сувоста. Кај многумина се препорачува нанесување хидратантен лосион пред или по ретинолот, во зависност од потребите на кожата.
Особено важна е заштитата од сонце. Ретинолот ја зголемува чувствителноста на кожата на УВ-зраци, па се препорачува користење на SPF 50+ при изложување на сонце.
Како што предупредува дерматологот Мајкл И. Џејкобс, во летните месеци се советува и намалување или привремено прекинување на употребата пред подолга изложеност на сонце.
Состојка со потенцијал, но и со правила
Иако ретинолот се смета за безбедна и ефикасна состојка, дерматолозите предупредуваат дека „повеќе“ не значи и „подобро“. Прекумерната употреба може да ја иритира кожата, особено кај чувствителни типови.
Кај бремени жени и доилки се препорачува избегнување на ретиноидите, додека останатите корисници треба да пристапат постепено и внимателно.
Сепак, кај повеќето луѓе кои веќе имаат искуство со ретинол на лицето, кожата на телото обично добро реагира – особено затоа што е подебела и помалку чувствителна.
Со правилна и доследна употреба, ретинолот останува една од најмоќните алатки за одржување на здрава, цврста и визуелно подмладена кожа.
Подготвила: Јелена Белимарковиќ
Поврзани објави