Ако ретинолот веќе има заслужено место во вашата рутина за нега на лицето, време е да му дадете шанса и на остатокот од телото. Оваа моќна состојка, позната по своите анти-ејџ придобивки, сè почесто се наоѓа во лосиони и кремови за тело, а дерматолозите велат дека причината е повеќе од оправдана.
Како дериват на витаминот А, ретинолот го поттикнува обновувањето на клетките, ја стимулира продукцијата на колаген и еластин и помага кожата да изгледа помазно, поцврсто и поедначено. Со други зборови – истите придобивки што ги нуди за лицето, може да ги обезбеди и за телото.
Зошто вреди да го вклучите во негата на телото?
Една од неговите најголеми предности е подобрувањето на текстурата и тонот на кожата. Редовната употреба може да помогне во намалување на хиперпигментациите, грубоста и нерамнините, додека кожата станува помека и посјајна.
Ретинолот е особено корисен и за зрела кожа бидејќи го поттикнува создавањето колаген, со што ја подобрува еластичноста и ги намалува фините линии, особено на рацете, деколтето и надлактиците.
Дополнително, благодарение на неговото благо ексфолирачко дејство, може да помогне кај затнати пори, акни на телото, како и кај популарниот проблем познат како „јагодести нозе“ (strawberry legs). Дерматолозите го препорачуваат и кај кератоза пиларис – ситните грутчиња што најчесто се појавуваат на надлактиците и бутовите.
Како да го изберете вистинскиот производ?
Доколку првпат користите ретинол за тело, почнете со пониска концентрација и формули збогатени со хидратантни состојки како хијалуронска киселина, глицерин, церамиди или шеа-путер.
За чувствителна кожа, избирајте производи специјално формулирани за минимизирање на иритациите. Важно е и пакувањето – ретинолот е чувствителен на светлина и воздух, па најдобар избор се непроѕирни и добро затворени амбалажи.
Како правилно се користи?
Ретинолот за тело најдобро е да се нанесува навечер, на чиста и сува кожа.
Поврзани објави
Доколку сте почетник, започнете со нанесување еднаш или двапати неделно. Ако кожата добро реагира, постепено зголемувајте ја зачестеноста. Не брзајте со резултатите – на ретинолот му се потребни неколку недели за да ги покаже своите ефекти.
Ако почувствувате сувост или затегнатост, нанесете богат хидратантен лосион или крем. Комбинацијата на ретинол и добра хидратација е клучна за здрава и негувана кожа.
Не заборавајте на СПФ
Едно правило никогаш не смее да се прескокне: заштита од сонце.
Ретинолот ја прави кожата почувствителна на УВ-зраците, па доколку изложувате делови од телото на сонце, задолжително користете крем со заштитен фактор SPF 50+. Во летните месеци, особено пред подолг престој на плажа, многу дерматолози препорачуваат и привремено намалување на употребата.
Дали ретинолот е за секого?
Во најголем број случаи – да. Кожата на телото е подебела и поотпорна од кожата на лицето, па ретинолот најчесто добро се поднесува. Сепак, лицата со многу чувствителна кожа треба да го воведуваат постепено и внимателно.
Единствен исклучок се бремените жени и доилките, за кои се препорачува да избегнуваат производи со ретиноиди освен ако нивниот лекар не советува поинаку.
Заклучокот е едноставен: ако сакате поцврста, порамномерна и поздрава кожа од глава до петици, ретинолот повеќе не треба да биде резервиран само за лицето. Оваа состојка со право стана една од најбараните во современата нега на телото.
Текст: Убавина и здравје
Фото: Freepik