Доколку косата ви опаѓа, ослабена е или расте побавно од вообичаено, причините може да бидат различни. Возраста и генетиката играат значајна улога, но не треба да се занемари ниту исхраната.
Експертите предупредуваат дека недостатокот на одредени хранливи материи може да влијае врз квалитетот, густината и растот на косата.
Недоволниот внес на витамини А, Ц, Д и Е, како и на цинк, железо и витамини од Б-комплексот, може да го забави растот на косата, па дури и да придонесе за нејзино засилено опаѓање.
Урамнотежената исхрана богата со овие хранливи материи може значително да го подобри здравјето на косата, особено кога проблемот е поврзан со нутритивни недостатоци. Исто така, протеините се од суштинско значење, бидејќи влакното на косата во голема мера е изградено од протеини. Истражувањата покажуваат дека недостигот на протеини може да доведе до ослабување и губење на косата.
Јајца – природен сојузник за силна коса
Јајцата се меѓу најдобрите намирници за здрав раст на косата. Тие се богат извор на протеини и биотин – две клучни состојки кои придонесуваат за цврстина и обновување на влакното. Покрај тоа, содржат цинк и селен, минерали кои го поддржуваат здравјето на скалпот.
Бобичесто овошје – витаминска бомба за фоликулите
Јагодите, боровинките, малините и другите видови бобесто овошје изобилуваат со антиоксиданси и витамин Ц. Овој витамин учествува во создавањето колаген и ја подобрува апсорпцијата на железото, што е важно за нормален раст на косата.
Антиоксидансите, пак, помагаат во заштитата на фоликулите од оштетувања предизвикани од слободните радикали.
Спанаќ – зелена ризница на хранливи материи
Спанаќот е богат со фолна киселина, железо и витамини А и Ц. Недостатокот на овие хранливи материи често се поврзува со проретчување и опаѓање на косата, па затоа редовната консумација може да биде од голема корист.
Масни риби – омега-3 за погуста коса
Риби како лосос, харинга и скуша се одличен извор на омега-3 масни киселини, кои можат да придонесат за подобар раст и поголема густина на косата.
Дополнително, тие се меѓу ретките природни извори на витамин Д, кој исто така игра важна улога во здравјето на косата.
Батат – тајното оружје за природен сјај
Бататот содржи големи количества витамин А, кој е важен за создавање себум – природното масло што ја навлажнува косата и го одржува нејзиниот здрав изглед.
Поврзани објави
Авокадо – храна за сјај и еластичност
Авокадото е богато со витамин Е, моќен антиоксиданс кој помага во намалување на оксидативниот стрес. На тој начин може да придонесе за заштита на косата од оштетување и прекумерно опаѓање.
Јаткасти плодови – мала ужина со голем ефект
Бадемите, оревите и лешниците содржат витамин Е, витамини од Б-групата, цинк и есенцијални масни киселини. Сите овие хранливи материи имаат важна улога во одржувањето на здрава и силна коса.
Семки – концентрат на хранливи материи
Тиквените, сончогледовите и ленените семки се богати со витамин Е и други корисни состојки кои го поддржуваат растот и виталноста на косата.
Црвена пиперка – повеќе витамин Ц од портокал
Слатката црвена пиперка е одличен извор на витамини А и Ц, кои придонесуваат за создавање колаген и заштита на влакното од оштетувања.
Грав – растителен извор на сила
Гравот обезбедува комбинација од протеини, железо, цинк и биотин – хранливи материи неопходни за оптимално здравје на косата.
Месо – важен извор на протеини и железо
Месото, особено црвеното месо, е богат извор на протеини и лесно апсорбирачко железо. Овие хранливи материи се клучни за снабдување на фоликулите со кислород и за одржување на здрава и густа коса.
Иако генетиката и возраста не можат да се променат, правилната исхрана може значително да влијае врз здравјето на косата. Вклучувањето на овие намирници во секојдневното мени може да помогне косата да биде посилна, погуста и посјајна, а воедно да се намали ризикот од нејзино опаѓање.
Фото: Freepik