Деновите кога хранливите материи му беа потребни исклучиво на нашето тело одамна се зад нас. Денес, витамините и минералите ги користиме и за кожата, ноктите – а сè почесто и за косата. Антиоксидансите стануваат клучен сојузник во борбата за силни, здрави и сјајни влакна.
Пренесуваме што велат дерматолозите д-р Хана Копелман (@drhannahkopelman) и д-р Серена Мраз (@drserena_mrazderm), како и сè што треба да знаете за најдобрите антиоксиданси за косата.
Како антиоксидансите ѝ користат на косата?
„Кратко и јасно – антиоксидансите се неопходни бидејќи помагаат во неутрализирањето на слободните радикали, кои можат да ја оштетат косата на клеточно ниво“, објаснува д-р Копелман.
Ова оштетување може да доведе до слабеење на влакното, зголемено опаѓање, па дури и појава на седа коса. Затоа, вклучувањето на антиоксиданси – преку исхрана, суплементи или локална примена – ја штити косата од надворешните агресори кои го забрзуваат стареењето и оштетувањето.
6 антиоксидантни херои што веднаш ги регенерираат влакната
1. Витамин А
Најпознат во светот на негата на кожата како ретинол, витаминот А е подеднакво важен и за косата.
„Тој е клучен за растот на косата и здравјето на скалпот. Доволните количини спречуваат сувост и кршливост, а делуваат и против опаѓање и предвремено седење“, вели д-р Мраз.
Д-р Копелман додава дека кај пациенти со сува и оштетена коса често ги проверува нивоата на витамин А.
👉 Го има во слатки компири, моркови и зелен лиснат зеленчук.
⚠️ Внимание: прекумерниот внес може да предизвика опаѓање на косата.
2. Витамин Ц
„Витаминот Ц е од суштинско значење за создавање колаген, кој ја дава структурата и силата на косата“, објаснува д-р Копелман.
Тој помага и во апсорпцијата на железо – минерал неопходен за растот на влакната.
Д-р Мраз додава дека витаминот Ц има силни антиинфламаторни својства, што го прави важен за здрав скалп и борба против првут и воспаленија.
👉 Се внесува преку цитруси, пиперки и зелка, но и преку шампони и балсами со витамин Ц.
3. Витамин Е
Поврзани објави
„Витаминот Е е вистинска моќ кога станува збор за здравјето на косата“, истакнува д-р Копелман.
Тој ја подобрува циркулацијата, овозможувајќи фоликулите да добијат повеќе хранливи материи – што директно го поттикнува растот.
👉 Присутен е во авокадо и јаткасти плодови, но и во масла и серуми.
„Локалната примена на скалпот го зголемува сјајот и виталноста на влакното“, додава д-р Мраз.
4. Полифеноли
Познати како моќни антиоксиданси од маслиново масло, зелен чај и темно чоколадо, полифенолите имаат повеќекратна улога за косата:
-
ја одложуваат појавата на седи влакна
-
ја подобруваат виталноста
-
ја штитат косата и скалпот од УВ-оштетувања
-
го стимулираат растот и ја продолжуваат фазата на раст на влакното
Д-р Копелман често препорачува и локални препарати со екстракт од зелен чај за подобра густина и здравје на косата.
5. Селен
„Селенот учествува во антиоксидативните процеси и е важен за здравиот раст на косата“, објаснува д-р Мраз.
Тој има силни антиинфламаторни својства и е исклучително ефикасен кај воспаленија на скалпот и првут.
„За лицата со првут, селенот може да биде вистинска пресвртница“, додава д-р Копелман.
👉 Се наоѓа во бразилски ореви, морска храна и јајца.
👉 Селен-сулфид е активна состојка и во медицински шампони против првут.
6. Ниацинамид (витамин Б3)
Ниацинамидот ја зајакнува кожната бариера, го намалува воспалението и го подобрува задржувањето на влагата во скалпот.
„Тој учествува во синтезата на кератин – главниот структурен протеин на влакното“, истакнува д-р Мраз.
👉 Се внесува преку риба, месо и цели житарки, а се наоѓа и во серуми, шампони и третмани за коса – погоден за сите типови коса.
Текст: Јелена Белимарковиќ