Цвеќе во чинијата: Необични но вкусни рецепти!

Ливчињата цвеќе во свеж, кандиран или во сушен облик им даваат посебен печат на јадењата – совршен мирис и примамлив изглед

Цвеќето што се јаде се користи во кулинарството илјадници години. Ноќничето се спомнува уште во Стариот завет како горчливо зачинско растение, а во многу култури одамна се користи во приготвување традиционални јадења. На Блискиот Исток најмногу се применуваат ливчиња на портокал и пупки на лијан, а во Јапонија цветот на цреша и на хризантема, додека, пак, Старите Римјани претпочитале слез, ружи и темјанушки.

Исто така, многубројни рецепти за приготвување цветови на тиквички ни доаѓаат од италијанската и од шпанската кујна. Цвеќето што се јаде последниве години ги краси специјалитетите на голем број ресторани, а од неодамна е достапно и во супермаркетите.

Салата со цвеќе

Ако сакате да направите салата од свежо цвеќе, можете да комбинирате путерка, цикорија, ендивија, ајзберг, рукола, матовилац, римска, црвен дабов лист и црвена бебилиф-салата. Изборот е ваш! Зачинете ја салатата како и обично, но додајте грст цвеќе што се јаде.

Похуван цвет на тиквичка

Состојки: 8 цвета тиквичка, 2 јајца, 6 лажици брашно, 2 лажици пиво, сол и црн пипер по вкус, масло. Приготвување: исчистете ги од инсекти цветовите тиквичка, измијте ги, извадете им го толчникот и исушете ги. Додајте брашно и пиво во пенесто изматените јајца, па потопувајте ги цветовите во добиената смеса и пржете ги во врело масло.

Путер со јоргован и со зачински билки

Состојки: 150 г путер, цветови јоргован, 2 лажици власец, 2 гранчиња естрагон, 2 лажици магдонос, 1 чешне лук, малку кора од лимон, сол и црн пипер. Приготвување: оставете го путерот да омекне на собна температура, па со него помешајте ги исечканите зачински билки, лукчето, цветовите и ренданата кора од лимон.

Сладолед од ружи

Состојки: 2 грста ливчиња од ружа (црвени), 7 дл млеко, 250 г шеќер во прав, 8 жолчки, малку цимет. Приготвување: варете ги ливчињата неколку минути во млекото. Исцедете ги, додајте им шеќер и цимет, па варете додека се згуснат. Додајте ги жолчките, една по една, и мешајте додека зовријат. Истурете ја смесата во калапи за сладолед и ставете ги во замрзнувач. Сервирајте со ливчиња од ружа.

Кое цвеќе смееме да го јадеме

Ако се јаде билката, се јаде и цветот! Меѓу нив се и овие убавци…

Ноќниче, лутиче, капуцинка, темјанушка, ден и ноќ, ружа, цвет од тиквичка, јоргован, јасмин, невен, детелинка, фуксија…

Текст: Т. Богунова

Фото: Инстаграм, Getty Images

loading...
Прочитајте и

Оставете одговор

Вашата мејл-адреса нема да биде прикажана.

Ви благодариме за коментарот!

This site uses Akismet to reduce spam. Learn how your comment data is processed.

Сакаш посебен третман?
Зачлени се во елитниот клуб. Регистрирај ја својата е-адреса и добивај специјални понуди и вести
Одјава е можна во секое време