Готова за 35 минути! На истиот начин можете да приготвите и чорба од брокули
Вкусните јадења од тенџере со изобилство зеленчук и со додаток од месо може да ви го отворат апетитот или дури и да ви го заменат главниот оброк.
Состојки: • 2 моркова • 1 лажица гриз • 1 помала главица карфиол • 1 лажица оцет • 1 јајце • 100 мл млеко • 2 лажици сечкан магдонос • 150 мл јогурт • црн пипер • масло • сол
Приготвување:
- Карфиолот се чисти од коренот и надворешните листови, па се кине на цветови. Се става во тенџере и се налева вода, се додава една лажица оцет и се вари додека омекне.
- Откако ќе омекне карфиолот, се цеди вишокот течност и се гмечи со виљушка, а водата од варењето се чува.
- Морковите се лупат и се рендаат на крупно, па се пржат во тенџере на малку масло, да омекнат. Се додава една лажица гриз и се пржи 1 минута, со непрестајно мешање.
- Се става карфиолот, па постепено се сипува супата што преостана од варењето на карфиолот, додека се добие посакуваната густина.
- Јајцето се мати со малку млеко и се става во чорбата. Се додава магдоносот и се зачинува по желба.
- Готовата чорба се трга од ринглата и во неа се додава јогурт.
Текст и фото: „Добра храна“