Пробајте го ова вкусно предјадење
Уживајте во фантастичниот вкус со „Сè за храна“! Оваа солена торта е омилена за време на куќните слави и имендени. Автор на рецептот е Марија Кочовска (@kocovska.marija), а уште вакви вкусни јадења може да најдете на sezahrana.mk.
Состојки:
- 500 г спанаќ
- 80 г путер или маргарин
- 80 г брашно
- 400 мл млеко
- 1 лажиче сол
- 5 јајца
За филот
- 150 г кашкавал
- 100 г сирење
- 250 г шунка
- кисела павлака по потреба
Приготвување:
1. Во тенџере на оган ставете поголемо количество вода да се вари. Исчистете го спанаќот од дршките.
2. Исчистениот спанаќ ставете го во зовриената вода и кратко избланширајте го. Потоа, исцедете го и ситно исечкајте го.
3. Во тенџере или поголема тава, растопете го путерот и во него малку пропржете го брашното, па додајте го исечканиот спанаќ и посолете.
4. Полека додавајте го млекото и постојано мешајте за да не се формираат грутчиња. Варете неколку минути, додека смесата убаво се згусне како пудинг. Тргнете ја од рингла и оставете ја целосно да се олади.
5. Во оладената смеса додајте ги жолчките и изматете со миксер. Ставете ги белките во посебен сад и изматете ги во цврст снег.
6. Во садот со спанаќот додајте ги белките и измешајте со лажица за да се соединат.
7. Обложете плех со хартија за печење, а потоа ставете ја смесата за пандишпанот. Печете во загреана рерна на 200 Целзиусовистепени, 20-30 минути.
8. Печениот пандишпан оставете го кратко да се олади, а потоа превртете го и отстранете ја хартијата за печење. Исечете го на два еднакви дела и оставете го целосно да се олади.
9. Исечкајте ги кашкавалот и саламата на ситни коцки. Издробете го сирењето со виљушка и ставете ги сите заедно во длабок сад. Измешајте ги и додајте кисела павлака за да се поврзат состојките.
10. Врз едната кора ставете го филот и израмнете. Потоа ставете ја и втората кора. Готовата торта ставете ја во фрижидер неколку часа, а потоа исечете ја на парчиња и послужете ја. Декорирајте со кисела павлака и кечап.
Во празничниот број на магазинот „Добра храна“ ќе најдете уште вкусни рецепти и содржини.
ФОТО: Катерина Спасеновски (@katerina.shambevska)