Еве како турските домаќинки прават вкусна чорба од црвена леќа
Ако барате брз, хранлив и вкусен оброк, оваа традиционална турска чорба од црвена леќа е одличен избор. Се приготвува од едноставни состојки, не треба претходно да ја киснете леќата и готова е за помалку од половина час. Кремливата текстура и ароматичните зачини ја прават совршена за лесен ручек или вечера.
Состојки:
- 250 г црвена леќа
- 1 главица кромид
- 2 чешниња лук
- 1 поголем морков
- 1 л бујон од зеленчук или вода
- 2 лажици маслиново масло
- 1 лажиче црвен пипер
- сол по вкус
- бибер по вкус
- малку суво нане
Приготвување:
Добро измијте ја црвената леќа под млаз ладна вода додека водата стане бистра. Ситно исечкајте ги кромидот и лукот, а морковот изрендајте го покрупно.
Поврзани објави
Во подлабоко тенџере загрејте маслиново масло. Додајте кромид и лук и кратко пропржете ги додека омекнат. Потоа, додајте го ренданиот морков и продолжете со динстање уште неколку минути.
Додајте исцедена црвена леќа и црвен пипер, па промешајте кратко. Сипете бујон или вода, посолете и забиберете по вкус. Гответе на средна температура, 15-20 минути, додека леќата и зеленчукот комплетно омекнат.
Тргнете ја чорбата од шпорет и изблендирајте со миксер по желба, за да добиете мазна и кремлива текстура. Доколку сакате порустична варијанта, оставете дел од зеленчукот неизблендиран.
Посипете ја чорбата со суво нане непосредно пред послужување. Послужете ја топла со парче тазе леб.
Совет:
- За автентичен турски вкус, додајте неколку капки лимонов сок при сервирањето.
- Ако сакате погуста чорба, намалете ја количината на течности за 100-200 мл.
- Љубителите на пикантни вкусови може да додадат прстофат лута толчена пиперка или чили-снегулки.
- Оваа чорба може да се замрзне и да се чува во замрзнувач до 3 месеца.