Со малку состојки, но богат со вкусови, едноставен за приготвување, хранлив и приспособлив – грашокот секогаш ќе остане класик на домашната кујна кој никогаш не излегува од мода
Никогаш не ни е доста од едноставните домашни јадења кои потсетуваат на детството – а едно од нив е и посниот грашок. Ова густо, миризливо вариво од зеленчук е совршен избор за лесен, но богат ручек, особено за време на постот.
Состојки (за 3-4 лица):
- 500 г грашок (свеж или замрзнат)
- 1 голема главица кромид
- 1-2 моркова
- 2-3 чешниња лук
- 1 компир (по желба)
- 200 мл доматен сок (или 2 лажици концентрат)
- 1 лажица брашно (по желба)
- 1 лажиче црвен пипер
- 1 лавров лист
- сол и бибер по вкус
- свеж магдонос
- масло и вода
Приготвување:
Ситно исечкајте ги кромидот, морковот на крукчиња или коцки, а компирот (ако го користите) на помали коцки.
Во тенџере загрејте масло, па додајте кромид и морков. Динстајте додека омекнат. Додајте ситно сечкан лук и кратко пропржете додека замириса.
Поврзани објави
Додајте ги грашокот и компирот, па сето тоа динстајте го заедно уште неколку минути, со непрекинато мешање.
Додајте црвен пипер, промешајте, па сипете топла вода за да ги прекрие состојките. Ставете лавров лист, поклопете и гответе на тивок оган, 20-25 минути.
Ако сакате погусто вариво, разматете брашно со малку вода и додајте го во грашокот. Додајте доматен сок, посолете и забиберите, па гответе уште 10 минути додека се соедини убаво.
Посниот грашок посипете го со свежо сечкан магдонос и послужете го топол со тазе домашен леб или со додаток риба за време на постите или месо кога не постите.
Совети:
- Посно на вода: Наместо масло, користете вода или зеленчуков бујон за динстање.
- Природна густина: Згмечете неколку коцки компир од варивото наместо да додавате брашно.
- Грчки стил: Додајте малку повеќе маслиново масло и мирудија за поинаква арома.
ФОТО: Freepik