Топло готвено јадење за цело семејство
Состојки:
- 500 г пилешки батаци
- 1 главица кромид
- 1 чешне лук
- 3 компира
- 3 лажици ориз
- 1 коцка пилешка супа
- прстофат мелена пиперка
- 2 лажици масло
- 1 лажица путер
- бибер по желба
- 1 јајце
- 2 лажици павлака
- малку грашок и морков по желба
Приготвување:
Измијте ги пилешките батаци и така, цели сосе коски, прелејте ги со вода и ставете ги на рингла. Кога водата ќе проврие, истурете ја и сипете чиста топла вода. Додајте масло, бибер по вкус и путер. Оставете да се готви.
Поврзани објави
Излупете ги кромидот, компирот и лукот. Измијте ги и ситно исечкајте ги, па додајте ги во тенџерето со батаците. Ако сте одлучиле да ставите и грашок и морков, сега додајте ги и нив. Ставете и измиен ориз, коцка за супа и прстофат мелена пиперка.
Кога батаците ќе се сварат, извадете ги од супата и одвојте ги од коските. Искинете го месото на парчиња и вратете го во тенџере. Ако треба, додајте уште топла вода. Варете уште неколку минути, па тргнете ја чорбата од рингла.
Во сад изматете јајце и кисела павлака. Промешајте, па сипете малку чорба и кога ќе се соедини, сипете ја во тенџерето со чорба. Промешајте и исклучете ја ринглата.
Уживајте во густата домашна пилешка чорба!