Одличен колач кога ќе посакате да се засладите и освежите. Во оваа комбинација, вишните даваат освежително-киселкав вкус, а може да се приготви со секакво овошје.
Состојки:
За кората:
- 4 јајца
- 4 лажици шеќер
- 4 лажици топла вода
- 4 рамни лажици бело брашно
- 2 лажици какао
- 1 лажиче цимет
- 60 г мелени лешници
- 1 прашок за печиво
За филот од вишни:
- 300 мл вода
- 5 лажици шеќер
- 1 пудинг од јагода
- 300 г исчистени вишни
- 5 г желатин
За филот од ванила:
- 400 мл млеко
- 1 пудинг од ванила
- 2 ванили
- 5 лажици шеќер
- 400 мл милерам
- 5 г желатин
За глазурата:
- 100 г чоколадо
- 3 лажици масло
Приготвување:
Поврзани објави
За приготвување на кората белките се одвојуваат од жолчките и се матат во цврста пена, постепено додавајќи шеќер.
Потоа се додаваат една по една жолчките и се долева вода во тенок млаз, непрекинато матејќи со миксер.
Посебно се соединуваат белото брашно тип 400, какаото, циметот, прашокот за печиво и мелените лешници, па се додаваат во смесата од јајца.
Пекачот се обложува со хартија за печење и во неа се истура смесата за кората. Се пече во загреана рерна на 200°Ц околу 15 минути.
За приготвување на филот од вишни се варат 250 мл вода со шеќер.
Посебно се миксираат вишните со 50 мл вода, па се соединуваат со пудингот од јагода. Смесата се додава во зовриена вода и се вари, со непрекинато мешање додека се згусне. Се додава набабрениот желатин и се меша додека се растопи.
Филот се прелева преку кората и се остава да се стегне.
За приготвување на филот од ванила се варат 300 мл млеко со шеќер. Во остатокот од млекото се мати пудингот од ванила, па се додава во зовриеното млеко и се вари додека се згусне.
Се додава набабрениот желатин во ванилинот колач со вишни и се меша додека се растопи. Во топлиот фил се додава и милерамот. Филот од ванила се прелева преку изладениот фил од вишни.
Преку изладениот фил од ванила се разлева чоколадна глазура.
Текст: Добра храна