Научете како да го приготвите највоздушестиот пандишпан и уживајте во совршениот колач
Пандишпанот е една од најважните основи во слаткарството, познат по својата лесна, воздушеста структура и благ вкус. Иако се приготвува од само неколку состојки – јајца, шеќер и брашно – неговото приготвување изискува прецизност и добра техника. Токму поради таа едноставност, пандишпанот е темелот на многу торти и колачи – лесно впива филови и сирупи, а притоа ја задржува својата мекост.
Состојки (за калап од 24 см):
- 5 јајца (на собна температура)
- 150 г шеќер
- 150 г брашно
- 1 кесичка ванилин шеќер (или екстракт од ванила)
- прстофат сол
- 1 лажиче прашок за печиво (не е задолжително, но помага)
Приготвување:
1. Ставете ги белките во еден сад, жолчките во друг.
2. Додајте прстофат сол и матете додека добиете цврст снег.
3. Потоа, постепено додавајте шеќер и матете додека смесата стане сјајна и густа.
4. Додавајте ги жолчките една по една, со внимателно матење со помала брзина.
5. Просејте брашно (и прашок за печиво ако користите), па рачно измешајте го со шпатула, со лесни движења одоздола нагоре.
6. Обложете го калапот со хартија за печење (немојте да ги мачкате страните).
7. Печење: загрејте ја рерната на 170-180 степени и печете 30-35 минути. Многу е важно да не ја отворате рерната првите 20 минути.
8. Кога ќе биде готов, оставете го малку да се олади во калапот, па извадете го и оставете го целосно да се олади.
Како да не ви спласне пандишпанот по печењето?
1. Јајцата мора да бидат на собна температура
Поврзани објави
Ладните јајца потешко се матат, затоа пандишпанот паѓа.
2. Добро изматен снег – пола завршена работа
Ако можете да ја превртите чинијата, а снегот не мрда – готов е.
3. Не мешајте го брашното прејако
Најчестата грешка! Ако прејако мешате, ќе го исфрлите воздухот – пандишпанот станува збиен и паѓа. Мешајте полека, со шпатула, со кружни движења.
4. Не отворајте ја рерната прерано
Наглата промена на температурата резултира со моментално спуштање на колачот.
5. Немојте да го препечете
Ако се исуши, подоцна ќе спласне. Треба да биде мек и еластичен.
6. Не го подмачкувајте калапот од страните
Тестото треба да се припива до рабовите додека расте – така добива висина.
7. Бавно ладење
Не вадете го веднаш на ладно или провев – наглото ладење го спушта.
Мал трик на професионалците: Кога ќе го извадите пандишпанот од рерна, можете да го превртите наопаку (во калап) и оставете го да се лади така. Тоа му помага да ја задржи висината и да остане рамен.