Уживајте во лесното сорбе од јагоди, идеално за топлите летни денови
Сорбе е освежителен, лесен леден десерт без млеко и јајца, совршен за жешките летни денови.
Состојки:
- 300 г свежи јагоди
- 100 мл вода
- 100 г шеќер
- сок од пола лимон
По желба:
- неколку ливчиња нане за послужување
- свежи јагоди за декорација
Приготвување:
Во помало тенџере загрејте вода и шеќер. Кога смесата ќе зоврие, загревајте уште околу 2 минути со повремено мешање. Тргнете ја од оган и оставете ја целосно да се олади.
Поврзани објави
Измијте ги јагодите, исчистете ги и изблендирајте ги во мазно пире. Во оладениот шеќерен сируп додајте пире од јагоди и сок од лимон. Добро мешајте додека се соединат сите состојки.
Префрлете ја смесата во плиток сад, погоден за замрзнувач и ставете го во замрзнувач.
По првиот час, извадете го садот и со виљушка или миксер, добро иситнете ја замрзнатата смеса. Вратете ја во замрзнувач. Повторувајте ја постапката на секој час уште 3-4 пати, за да добиете мазна и кремлива текстура.
Кога сорбето ќе биде потполно замрзнато и кремливо, оставете го 5-10 минути на собна температура пред да го послужите во разладени чаши или чиничиња. Украсете со свежи јагоди и ливчиња нане.
Совети
- За поздрава верзија, шеќерот можете да го замените со мед или стевија.
- На истиот начин можете да приготвите сорбе од малини, манго, боровинки или мешано шумско овошје.
- Ако сакате особено мазна текстура, пред да го замрзнете, процедете го пирето од јагоди низ ситно сито за да ги отстраните семките.
ФОТО: Freepik