Велигденските јајца не се само дел од традицијата – тие се симбол на радоста, новиот почеток и животот
Многумина од нас одбираат што пошарени бои за велигденските јајца, но ретко кој знае дека и нијансите што ги одбираме носат одредена порака. Токму затоа, свештениците советуваат при бојосувањето јајца да не се водиме само според естетиката, туку и според значењето што стои зад секоја боја, бидејќи Велигден не е обичен ден – тоа е празник на светлоста и надежта.
Велигден е најголемиот христијански празник, па црквата препорачува и бојосувањето на јајцата, како симбол на овој празник, да биде во склад со тој дух и симболика. Свештениците објаснуваат дека постојат три бои што најдобро е да се одбегнуваат, бидејќи не го отсликуваат духот на празникот на Христовото воскресение. Иако во денешно време домаќинките се трудат не само да применат што попривлечни техники на украсување велигденски јајца, туку и да воведат иновации кога станува збор за боите, сепак, свештениците наведуваат дека не се сите бои соодветни за велигденските јајца.
Меѓу непожелните бои спаѓаат:
Поврзани објави
- црна
- кафена
- темносина
Оваа мрачна палета повеќе се поврзува со страдалната седмица, последната седмица од велигденскиот пост, кога верниците се сеќаваат на Христовото страдање. Но Велигден симболизира воскресение, обнова и радост, така што тажните тонови не се соодветни. Би требало да се нагласи дека не постои строга забрана за користење на овие бои за велигденските јајца. Имено, изборот на погрешна нијанса не се смета за грев – тоа повеќе е прашање на традиција и празничен дух.
Кои бои се најсоодветни?
Главна велигденска боја е црвената. Таа симболизира живот, победа и прослава. Највпечатливата нијанса е онаа што се добива со бојосување јајца во луковина. Инаку, изборот на бои, шари и методи на украсување зависи од секоја домаќинка. Најважно е велигденските јајца да носат радост и да придонесат за свеченото чувство по повод најголемиот христијански празник.