Што сѐ се става во божиќната погача: Стари обичаи за привлекување среќа и пари во домот

Божиќната погача се приготвува на Бадниково утро или на Бадникова вечер и обично се користи бело брашно, сода бикарбона, малку сол и осветена вода.

Покрај овие состојки, во погачата задолжително се ставаат и одредени предмети за кои се верува дека носат пари и среќа во домот.

Најголемиот број луѓе во погачата задолжително ќе стават паричка, бидејќи се верува дека носи пари и среќа, како и парче бадниково гранче, кое на оној што ќе го скрши парчето со него ќе му донесе плодност и добро здравје, а од истата причина се става и дрен.

Во некои краеви, во погачата се става пченка (за свињите), грав (за овците) и овес (за коњите). Оние што чуваат кокошки и друга живина, во погачата ставаат и зрна пченица.

Божиќната погача се јаде за појадок на Божиќ, кога сите домашни ќе се соберат околу свечената трпеза.

Прво домашните ја вртат меѓу себе три пати, а потоа погачата се крши и се јаде пред другата храна.

Оној што ќе ја пронајде паричката или гранчето, треба да ги чуваат на посебно место, додека пченицата, овесот, гравот и пченката им се даваат на животните поради кои се ставени во божиќната погача. Во некои краеви, се верува дека ако при печењето на погачата тестото се подигне над пченката, на пример, тој насад ќе даде богат плод таа година.

Во некои краеви од бадниковото гранче се прават форми на книги и јарем, кои исто така се ставаат во погачата. Оној што ќе ја најде книгата во погачата се верува дека добро ќе го служи паметот, а оној што ќе го извлече јаремот, се верува дека најмногу „ќе повлече“ во текот на годината.