Дали љубовта треба да се вербализира или само очите ќе зборуваат?

Дали љубовта треба да се вербализира или само очите ќе зборуваат?

SHARE

„И понатаму ме фасцинираш и ме инспирираш. Влијаеш на мене да бидам подобар. Ти си предмет на моите желби и главна причина за моето постоење. Многу те сакам.“

83878_profimedia0217865281_300x0

Не знам дали ве полазија морници по кожата, „превртевте очи“ или слатко се насмеавте на овие зборови, но ова е извадок од вистинско љубовно писмо. Не е готова порака која за родендени и валентајни кружи по телефони и комјутери, убаво уредена на некаква розеникава фотографија, иако… не сум сигурна дека не е употребено и во такви цели. Овие зборови и ги упатил Џони Кеш на својата сопруга Џун за нејзиниот 65-ти роденден.

Џони Кеш и Џун Картер
Џони Кеш и Џун Картер

Не важно и ако некој не знае кој е Џони Кеш или Џун Картер и каква е „нивната приказна“, важно е дека овие зборови се вистински и упатени од еден маж кон една сакана жена, и тоа на лист хартија. Сите ние знаеме дека љубовното писмо е „мртво“, умре и пред нашето време, но она што не го знаеме е – кој ја уби моќта на мажите одново и одново да ги освојуваат своите жени со искажување на емоциите низ зборови? Во кој момент за нив, а и за нас ќе признаме, стана срамно, смешно или банално да се искажат копнежот, желбата, љубовта со зборови, како што тоа некогаш го правеле господата кон своите дами и во фазата на додворување, но и многу подоцна во нивната комуникација?!

 Габриел Мецу Metsu's „Маж што пишува писмо“, 1664, Национална галерија, Ирска
Габриел Мецу Metsu’s „Маж што пишува писмо“, 1664, Национална галерија, Ирска

Збирката „Љубовните писма на великаните“ (Love Letters of Great Men), уште пред да постои, послужи како база за заплетот на филмот „Сексот и градот“, а подоцна беше уредена и издадена на барање на фановите. Но, идејата на сценаристот сепак не е оригинална, во 1920 било издадено дело „Љубовните писма на големите мажи И ЖЕНИ: од 18-от век до денес“ (“Love Letters of Great Men and Women: From the Eighteenth Century to the Present Day” 1920 година), дело со оригиналните писма напишани на оригинален јазик, вклучувајќи го и писмото на Бетовен. Можеби на овој начин и се „излити“ суштината на овие писма, кои постоеја како документи, како нечие вистинско минато, нечиј живот, нечија љубов и пред филмот, и пред новата збирка… Но, несомнено, популарноста на „љубовта“ на Кери и Биг ги популаризира до невидени размери зборовите на љубов, страст и очај на големиот Бетовен.

„Дури и в кревет, моите мисли копнеат по тебе, бесмртна моја љубена, некогаш радосна, потоа пак тажна… ја очекувам судбината, да видам дали ќе нè задоволи. Единствено можам да живеам со тебе или воопшто да не живеам…

Засекогаш твој.

Засекогаш свој.

Засекогаш наш.“

Да… Само… интересен е и фактот што новото издание се фокусира на писмата од господата кои исчезнаа некаде на патот од 18-от век до денес, а жените се чини сме се’ уште некако таму, некоја повеќе, некоја помалку. Барем што се однесува до тоа дека нам не ни срамно, ниту бедно, да кажеме како се чувствуваме во врска со некого. И, далеку од тоа дека некој тука е застарен или бега од фактот што денес е ера на дигитална комуникација или доба на СМС или „текстинг“, а има и најнов термин – „секстинг“: „дигитална комуникација со сексуална содржина“, знаеш… ова, она… Напротив!

text-messages-main

…но, ние би сакале низ мрежата да прострујат вистинските емоции на сите големи мажи и жени кои некогаш или се’ уште и денес, полни со љубов, страст, надеж  или копнеж комуницирале или комуницираат преку писма со својот партнер. Воопшто не се потребни накитени фрази, важна е суштината на кажаното.

Ве покануваме да споделите фотографија од рачно напишано писмо од вашата или приватната колекција на вашите родители или предци. Ако сметате дека е премногу интимно, доволно е да споделите фотографија или извадок од писмото, и назначете ни – и ние ќе ја почитуваме приватноста. На крајот, сепак некои разменувања нежности и треба да си останат само помеѓу двајца, ако ме разбирате.  😀 Но, би сакале да инспирираме љубов, комуникација во љубовта, која наново и наново ќе не’ потсетува зошто се вљубивме во некого или тој во нас.

Првата анонимна објава е наша!

...Ул. Орце Николов бр. ..91000 Скопје
…Ул. Орце Николов бр. ..91000 Скопје

„Сакам сите мориња да бидат мои и твои, да направиш да бидам свесен за се’ околу себе, да не морам самиот да ги тапкам своите патеки“

Споделете ни дури и да не сакате да учествувате, нека стаса аберот до некого кој би сакал! А и да не учествувате поради интимноста или други ваши причини, секако, ќе разбереме, но ве мотивираме – потсетете го денес партнерот со свои зборови зошто го сакате!

Затоа што за нас љубовта не е банална тема, за нас љубовта е суштинска и убава, а ние сме „Убавина и здравје“. Благодариме

Јована Стојменовиќ –

главен и одговорен уредник

„Убавина и здравје“

НЕМА КОМЕНТАРИ

Оставете Одговор